"Pelangi Batak" Sibalik Hunik" Episode 3

Ndang di ulahi si Binsae be ende i sian referen. Ai nungga sabi-sabi pamereng ni protokol i tu imana. Tangan siamun dohot tangan hambirang na nungga gok marisi hepeng. Tangan siamun na marisi hepeng laos di jalanghon mai tu si Vannesa. Sian tangan hambirang laos disurukhon tu kassuni protokol i. Songon dalan manopoti sala ma ra i.

Diadu anggini si Vannesa do muse si Binsar di dok asa marborngin di jabuna. Dohot lambok ni roha di jua si Binsar do. Jala muse cuti na pe ndang piga ari holan tongkin do.

“Pasahat ma tabe ku dah. Ndang boi ahu. Sahali nae pe. Ro pe ahu” ninna si Binsar manjua. 

Lapo jonokhon ni sirpang dua i disima si Binsar paima mobil. Pukkul lima ma parpudi mobil sian huta i laho tu Medan. Leleng nai asa pukkul lima dua jom nai. Dilapo ima si Binsar paimahon.

“Jei lae do donganni si Panisa” ninna sahalak ama-ama naung lobangon. Ndang haro tangkas be mandok Vannesa, Panisa nama di dok goarna.

“Ido, Tulang” ninna si Binsar. “Ito baen jo kopi i” ninna si Binsar “kopi do di tulang manang tes manis?” disungkun tu ama-ama i. “Kopi ma bah!!” ninna alusna “kopi ma baen ito. Dohot sigaret gudang garam sada” ninna si Binsar manjalo tu parkode i. dibereng sigaret ni ama-ama i gudang garam merah.

“Nion sigaret ,lang” dilean si Binsar sigaret i.  “Boasa pintor mulak Tulang so sae dope ulaon i” ninna si Binsar manungkun.

“Horong nami nungga sae be. Ido asa barina iba mulak”

“Oh...”

Holan Ama-ama ima dongan ni si Binsar manghatai di lapo i paima mobil. Gok do nian angka jolma di lapo i. Alai ndada pola olo mandongani si Binsar. Ala jolma parroima ra i. Sada muse ndang dohot be jolma na dilapo i tu ulaon unjuk ni si Vannesa. Dapot pukkul lima pintor ama-ama ido mangambat mobil laho tu Medan. Nangkok ma tu Mobil si Binsar laos di jalangkon tu ama-ama songon parsisigaret.

“Mauliate, Tulang “ ninna si Binsar didada ama ama i.

***

Marembas dope di alaman, marsorak marlasni roha. Songon ende panutup ni ulaon i di endehon ma O TANO BATAK.  Molo Si Vannesa nungga ditogu be tu jabu. Sijalo titin maragkup ma manogu tujabu. Jolo diliathon jo tolu hali di alaman huhut manortor ndungi ditogu ma tu jabu sahat di jabu dibaen muse boras pir. Uli ma adat batak i. Denggan jala homi.

Borngin naparjolo di si Vannesa dohot parhalang uluna. Borngin nagok holong. Ndang holan i nian borngin na gok holong. Disude borngin do gok holong alai borngin i tung apala lobi holong i. Marsitombisan jo, marsigoitan ndungi martalunggup sae i marembas ndungi mar.... Sude ma pakke-Mar....

***

Dipapodom si Binsar di mobil i paima sahat Tu Medan. Bonosan do imana. Tongma alani ringkot karejo asa humatop imana mulak. Dirohana nian apala mangulon jo sadari. Tung pe songoni Mauliate ma ala dilean dope di imana cuti opat ari. Di Manado ma imana mangulon mangalap gogo asa gompis laho karejo.  

Langa ari ari nabinolus ni si Binsar ndang disi be si Vannesa dongan na tusan tuson. Ndang laho adong be mandok “Roho tu jabu mangan. Mangalompa manuk ahu. Mangarsik dengke ahu. Manuhor panggang ahu” sadanari mambaen lulu-lulu rohani si Binsar ndang adong be dongan na marende dohot tu gareja. Mulak mandosor ma muse sahalak na. Mandosor mandiori dongan na burju marroha. Songon na haagoan di hilala si Binsar di parmulini si Vannesa, ndada tuk gogona manghatahon i.

Sahat di Manado balisaon si Binsar ditilik-ditilik museng handphone nai. Somal do antong mangido dialap si Vannesa sian inganan karejo na molo ndung pukkul opat. Lalap di tilik. Ngongong tutu si Binsar dinarame. Lumobi borngin laos mangan tu ruar ma si Binsar sahalaksa. Disudahon ate atena.

 Holan sabulan do nian songoni. Holan si sabulan ido dior-dior rohana. Ndung salpu i songon na somal na ma, lobi muse ndung satoan nungga sipata lupa. Barita ni si Vannesa pe sian na muli rodi naung sataon ndang adong. Ndang tingkos dihilala si Binsar molo imana jumolo manungkun barita. Laos di pasombu si Binsar ndang marbarita.

On ma na padua taonton ndung marhamulian si Vannesa. Tarsunggul si Binsar tonga borngin. Dinipi madabu si Vannesa tu lombang na mansai bagas. Satonga mate si Binsar mandiori dilombang ndang ra dapot gabe Imbo do dapotna,hodokan si Binsar na tarsunggul i. 

“Dao ma i. Nipi ni halak mai” ninna si Binsar mandia rohana.

Manogot ni ari dibaranihon imana ma manelefon si Vannesa. Holan masuk songoni do telefon na ndang maralus.

“Sehat doho?” di SMS on si Binsar ala soadong alusna. Sajom dua jom ndang maralus di telefon si Binsar muse. Lalap do songoni soada maralus.

“Horas horas ma hita. Jala sehat barita” ditongos si Binsar muse SMS na paduahon.

***

Ari minggu diparsitongaan ni bulan ualu dua ari nae asa pesta Negera manang hari kemerdekaan, ima ari hatutubu ni si Vannesa. Di uji si Binsar muse manelefon lalap do ndang maralus.

“Selamat Ulang Tahun ma diho, akkeh!!! Lam sehat jala lam langgeng. Tuhan memberkati” ido isini SMS na tinongos ni si Binsar. Paet do tutu molo so maralus ganup aha pe na nidok lobi molo nisungkun. Songoni ma nang rohani si Binsar, paet dihilala.

Pukkul sabolas borngin mangolu dope TV dibiluk ni si Binsar naing manonton bola rohana. manghuling handphone na jala di ida “Si Roa balang. Call” dialusi si Binsar huhut do di parmeam meam sendok na dibagas galas marisi kopi..

“Ise on” ninna sian bariba telefon.

“Bah!! Nungga lupa ho akke janggual, pirdo tahak mu mandokkon ise on” ninna si Binsar huhut do mengkel imana. “Ai ndang si Vannesa on?” disungkun si Binsar.

“Oh, Daong. Anggina do on?”

“Boasa ho maniop handphone kakakmu? Di dia haroa imana?” disungkun si Binsar.

“Ise on ningkku do” ninna mangalusi hatani  Si Binsar.

“Oh, ahu do on. Si Binsar. Di tanda ho dope ahu? Na marende di pesta ni kakak mu?” Dipatorang si Binsar uju di pesta.

“Hutanda” laos mate telefon i.

Di telefon si Binsar muse. Atik na suda do pulsana. Los so maralus. Di uji muse lalap ndang maralus.

“UNANG BE TELEFON TU NOMOR ON. ALANI HO SEGA RUMAH TANGGANI KAKAK KU. BOTUL DO BAOA NASO HASEA HO. IA ALA SITANMU SOI NAMA”

Songot rohani si Binsar manjaha SMS i. Ditelefon patingkoshon ndang olo mangalusi. Lalap SMS bura-bura dapotna. Dipalea lea si Binsar marhite SMS rodi do muse SMS i huruf besar sude.

“Boasa alani ahu? Jala aha salangku? Tingkos jo baensian i” dibalos si Binsar.

“UNANG ANTAR PAOTO-OTO. SIRANG KAKAK SIAN AMANTANA HOLAN ALANI HO. BOJAK RANGGANG”

“Angkat jo telefon i. Jala lean tu kakak mu naing manghatai ahu”

“NDANG ADONG DISON KAKAK KU. PASOMA HATA HATA MI.”

Disudahon ate ate ni si Binsar manjaha SMS i, toe muse ala di dok alani imana sursar rumah tangga.

“Naboha do nuaeng? Boasa marsapu sapu tu ahu? Hape nungga hu holangi nian angka si Songon i. Hu jaga do unang sampe mandia angka jolma. Unang sampe di hata nadeba”

Ngeri dihilal si Binsar. Hape dia ma dah??? Di dok si Binsar asa manghatai di emper tingki martading hata asa unang mandia do rohani pariban nai molo di biluk na. Di gurdak pe tingki peak di biluk na unang asing do pingkiran ni paribana. Di pesta ipe songoni do. Hape nuaeng gabe si Binsar do didok sipanegai di rumah tangga ni si Vannesa.

“Di dia kakak mu?” disungkun si Binsar muse marhite SMS.

“AHA NA SINUNGKUNANMU DISI? A LASBE ROHAM ANTONGSEGA RUMAH TANGGA NI KAKAK I"

Bura bura dapot ni s Binsar, hansit rohan manjaha SMS i. Sai di palambok ate atena mangalusi. Lam dihariaar do balos ni SMS. Dipalabe mangalusi gabe dipalea do. Marpingkir jo tongkin si Binsar asa di balos SMS.

“Roham ma bah!!! Molo alani ahu do nimmu sega rumah tanggani kakakmi. Hatahon ma aha hu baen manegai unang holan manudu malo, patandahon pe ingkon do jago” mostok ate ate ni si Binsar mambalos SMS i. Tok uluna majaha.

Nungga sae sangombas parbola ndada adog di tonton si Binsar hape parbola hasolomanna i dah! Dipaima balos ni SMS na ndang marna sahat. Dipaima ndang marna mullop boa-boa sian hanphone ni. Sahat tu nasae parbola balos ni SMS ndang marnamullop. Di telefon si Binsar ndang tabo panghilalaan na. Alani laos so modom simalolong na lobi muse parbola i laos talu Clup sinolom ni rohana. Didanggurhon remote ni TV i di Tendanghon Bantal muse. Tok uluna. Sai di telefon sai ditelefon so maralus. Ditelefon imana “ingkon sampe di alusi” dijugulhon si Binsar. Sahat tu pukkul lima manogot di telefon lobi saratus hali i. Ndang di ingot si Binsar pe napapiga pulu halihon di telefon, maralus ma telefon i.

“Hallo..?” ninna si Binsar. Gogo soarana.

“Mmm..” ninna sian bariba.

“Hodo on roa balang?” ninna si Binsar. Holan hata “hmm” do dibege si Binsar pintor diboto do na si Vannesa mangalusi. Ido somal ni si Vannesa holan “mmm” do alusna.

Songgot si tutu rohana namangalusi sian bariba. Dipahundul dipodoman i “Binsar...” ninna mangalusi.

“Aha i?”  dialusi si Binsar. “Di dia anggim lean jo tu imana” disuru si Binsar.

“Sian dia dibotoho nadison anggiku?” ninna si Vannesa manungkun.

“Lean majo. Ringkot. Masihol ahu tu ibana”

“Tu nomor na telfon” ninna si Vannesa.

“Ndang di alusi” hape soadong nomor anggini si Vannesa di imana. “Lean jo tongkin”

“Modom dope...”

“Dungoi”

“Dokkon ma tu ahu. Asa hu pasahat” ninna si Vannea mangalusi.

“Sadihari ho gabe Pos sipasahat barita dohot sipasahat tona?” ninna si Binsar. Ndang pintor disungkun imana taringor rumah tanggana.

“Hehe, nungga leleng” ninna si Vannesa.

“Di dia lae i?” paula so diboto si Binsar aha namasa.

“Modom”

“Modom? Balga ni gabus mi" ninna si Binsar.

“Ndang porsea ho?” ninna si Vannesa papos rohani si Binsar.

“Hahaha.. porsea do saotik” ninna si Binsar. “Nungga bei modom maho. Ahu pe naing modom nama” dibereng si Binsar jam na gaung di dindingna nungga pukkul tonga onom sanga dope modom apala sajom, pukkul ualu pe masuk karejo.

“Baru sae manonton bola ho kan?” ninna si Vannesa.

“Ido. Modom ma ho” sojolo dibege alusni si Vannesa nunga dipensethon si Binsar narara na di handohone i.

Ndungpe di jaha si Vannesa pesan terkirim dohot sada kotak masuk na so hona jaha dope asa tarjolma imana. Dijaha sude, mulak ulak di jaha. Lungun rohani si Vannesa manjaha pesan terkirim i. Dimanogot ima tarilu si Vannesa. Dimanogot i muse parjolo ruar iluna ndung sai diporo dua taon nabagas. Laos SMS i paingothon imana.

“Eh, Tuhan bagianki” mansai lungun rohana maringot partingkian naung binolusna. Dipasombu imana bulus Ilu nai manomu mataniari binsar. Sonson tu parningotanna hatani si Binsar : binsar pe mataniari manogot i laho manondangi angka roha naholom do ndada holan manondangi portibion. Tutu mai holom do rohani si Vannesa. Dipapitpit si Vannesa simalolong na ndung di ingot hata i. Di ingot muse angka hansit ni roha.

Onom bulan ndung marrumah tangga ndang holong be dipatu parhalang ulu nai tu ibana. Holan gabus do sude. Ndung sae putek haboaruonna pintor putek do muse holong ni amantanai. Sae didudus pamatangna na laos durus do muse holong ni siadopanna i. Laos alani namasa i gabe marsanding angka namareda di Huta. Laos somarsipangkulingan be natoras ni si Vannesa tu simatuana. Hinorhon ni rumah tangga na pinungka ni nasida.

“Si Binsar do jumolo mangapodomi ho. Ndang ahu!!!” songon hujur napatting tu ate ate hatai dibege si Vannesa. Dipungka parhalang ulu nai bada bolon di botni ari ndung tarjaha ni si Vannesa SMS di handphone ni amanta ni “makasih untuk malam itu yank. Enak dan puas. Jadikan malam minggu kita jalan”

Lambok do hatani si Vannesa patumpolhon i tu parhalang uluna hape laos rimas do dapotna. Laos pariti rition laos marsapu sapu dohot si Binsar.

Ndang holan ni di dok Amanta nai, gok dope angka bura dohot narorang.  mangangguki ma si Vannesa mambege bura dohot hata rorang i. Panolsolion bolon dirohana muli tu paribanna i. Holan sabulan do rap modom nasida ndung borhat tu Jakarta ndung sae ulaon unjuk.

Hea sahali di ihuthon si Vannesa amanta nai ala kaluar sian jabu mar taxi ma si Vannesa unang ditanda parhalang ulunai. Dipauba uba rupana asa boi jonok. Toho ma tutu tu jabu ni jolma do sahat Amanta nai, ianggo hatana sian jabu naing jumpa dohot bos, adong naringkot.

Paniop ni Amanta nai ditanganni borua na nialapna sian jabu i so inama, di ungkap dope pintu ni Mobil asa bongot borua i. Ndang tarbereng ni si Vannesa laos mulak imana tu jabu huhut mangandung. Di jabu dipareso si Vannesa saluhut na adong di biluk karejo ni Amanta nai. Dibereng di komputer angka fhoto naso suman.

“Bah!!!! So saut dope hape tu ahu nungga songoni pangalahona” marsuap ilu jo si Vannesa di Biluk i mida angka fhoto na adong di Komputer i. Holan fhoto najorbut dibagasan. Dohot do email di pareso si Vannesa lam malala ate atena manjahai Email i, leak do ndang hea dipaloas si Vannesa mambalos angka email na masuk. Aha na adong dibagas komputer i di copy si Vannesa ma sude, dipasada disada inaganan narmargoar flasdisk.  Ndungkon diboto songoni pangalahoni amantana ndang dipauba si Vannesa parangena. Ganup manogot diparade do kopi tung pe sipata ndang di inum amanta nai.

Ditingki martongkar, marbada bolon ndung saminggu  anggini si Vannesa ditait tu jolo ni nasida laos dijoloni Anggina nai do dipasuda si Vannesa dilombut di hatai. 

“Si Binsar do nampuna ho hape. Tanda sian tangis na tingki marende di pesta i sian panghaol mu di gareja. Parpodommu di biluk na andorang soborhat hita sian Manado” 

Mansia gogo tutu didok amanta nai dijoloni Anggina. Ima bingkasna  dipatu bada dijoloni Anggina. Ndang sadia leleng ndung bada bolon i. Pintor mulak do si Vannesa dohot Amanta nai tu huta dohot do Anggina. Diparmulak ni nasida ido dipaulak si Vannesa tu jabu ni Inong na. Sian ima harooa gabe songo rohani Anggini si Vannesa mida si Binsar. Jut rohana jala mansai sogo hian.

“Ajari hami jo boru muna on. Holan tu baoa na asing rohana” ninna  paulakhon si Vannesa.

Mangandung bobar ma Inong ni si Vannesa mambege i, dipaulak boruna. Hailaan bolona on. Hasesega. Pintor ronggom muse ma angka hombar jabu ndung dibege andung.

“laos so diboto ho magom. Ndang di ingot ho naung mabalu ahu!!” diandungi si Vannesa dijoloni natorop i.

“Inong!! Ndang songoni Inonghu. Hu ingot do nahinsit. Anak ni namboruki do manegai rumah tanggna. Ndang ahu namanimbil Inong” ninna si Vannesa mangalusi. Diahaol Inongnnai.

“Tuuu sadan maho... !!!Tusadan!!! songoni burju anak ni namboru mi. Songoni denggan parangeni”  ndang porsea Inong ni si Vannesa di alus ni boruna i.

Dibege Amanta ni si Vannesa do sude alai pis do parnidaanna. Laos di tadinghon do nasida mangandungi disi. Mulak imana tu jabuni Amangna.

*** 

“Ingkon paulakon na haroa?” ninna Among na manungkun.

“Tu mangon di paulak!!! Molo songoni do. Ahu pe ndang olo marparumaen songoni” gabe inantai do sangkan. “Buria pus...” muruk simatua boru ni si Vannesa.

Laos alani marbada bolan ma namareda. Marsalili ndang marsipangkulingan be. Hape dilaon laon ni ari ndung borhat muse Amanta ni si Vannesa tu Jakarta manguduti karejona. Ndang gok dope sabulan nungga tarbarita sahat tu lumban pinasa naung mangoli muse. Humajebur ma barita di huta i.

“Tumangon mangoli muse molo dang suman sinaparjolo” paet hata i dibege Inong ni si Vannesa.

Naing do nian dipatudu si Vannesa angka gombar dohot email nabinuat na sian komputer karejoni Amanta nai. Alai bohama tahe. Apala subang do sude fhoto i. Angka fhoto naso marpahean do rap dohot borua. Songoni namasa i. Laos lintun ma si Vannesa tu Medan rap ma imana dohot anggina. Ai di huta pe imana nungga dibabani deba. Dihata deba. Aha be na jinambaranna, amantana pe nungga mangoli muse. Hatani Inong na pe mansai paet. Alani do muse gabe marpuri mago si Vannesa.  Dokdok ma sitaononna. (Marudut - Bersambung)

Penulis : Erikson Simarmata